中環出更：戴唔到聖誕帽？梁君彥：頭大要有腦
二○一八年嚟到尾聲，立法會尋日就舉行午間音樂會邀請學生嚟表演，同立法會議員一齊迎接聖誕。音樂會有十幾位議員出席，佢哋齊齊戴聖誕帽同學生合唱，不過立法會主席梁君彥戴帽時就唔多順利，左戴右戴都戴唔實。金融界議員陳振英（Ronick）見狀就笑梁係咪個頭太大，點知梁就反問：「係咪話我頭大無腦？」Ronick就解釋係講緊梁主持會議搞到頭都大埋啫，唔係生理上嘅頭大。梁於是笑笑口話：「頭大唔緊要，最緊要有腦！」
Ronick仲話自己好鍾意小朋友，而今次表演嘅學生當中有智障人士，佢對智障學生特別有感情，事關佢仲讀緊書嗰陣做過義工幫助智障兒童，學過同佢哋溝通嘅技巧同埋點同佢哋玩遊戲，知道要多啲讚佢哋、唔好打斷佢哋講嘢等，所以見到今次活動就踴躍參加，仲話只係犧牲一餐飯嘅時間，就可以令學生開心係好值得咁話。
謝偉銓象哥唔識唱疑咪嘴
大合唱尚算順利，不過進出口界議員黃定光（象哥）同建築、測量、都市規劃及園境界議員謝偉銓（Tony）就有「咪嘴」之嫌。象哥解釋自己舊時唔係讀基督教學校，對聖誕歌唔係好熟。Tony就話，雖然佢讀佛教小學，但都參加過詩歌班，可惜小學之後就冇唱，依家咁忙就更加少唱，不過佢都覺得唱歌會令人開心啲，所以都嚟參加音樂會。
至於過往曾於立法會音樂會同學生一齊打鼓嘅教育界議員葉建源，今次就淨係同學生合唱。佢話用咩方式都唔重要，最重要係要有氣氛，又憶述小學時有學校老師喺聖誕聯歡會上扮聖誕老人，氹到佢哋非常之開心，時至今日佢都依然記憶猶新，依家人大咗反而少咗慶祝，通常都係趁假期去旅行，而佢今年就會去泰國避寒喇。
卓妮