政情：今日你上鏡：袁彌昌袁彌明兄妹合體拍片呃Like

前港姐、人民力量前主席袁彌明（Erica）近年淡出政圈，主力做自己嘅美容王國生意，而佢阿哥袁彌昌（Derek）就做咗新民黨姑爺，娶咗立法會議員容海恩。兩兄妹多年嚟唔單止政見唔同，更甚少喺公開場合同場，但為咗「呃Like」佢哋就合體拍片，呃咗唔少無知少男少女去睇片添！

話說Derek前晚喺社交網站分享Erica公司一條短片，片頭就見到Derek好熟手咁敷眼膜，佢仲用手指喺塊膜上面「彈琴」。用完之後，Erica投以羨慕嘅眼光，話阿哥兩個眼袋都收緊晒，Derek就話「拍得住袁彌明」，點知妹妹一啲都唔畀面話「你就想」。

當以為睇落去會見到Derek實測試用眼膜嘅過程時，卻發現原來得片頭約十秒，搞到有網友留言話好失望，但亦有人大讚好正，形容係最期待嘅畫面出現了。此外，Derek老婆容海恩都第一時間Like條片，唔知Derek會唔會好識做記得入貨畀老婆試吓呢？