政情：怕兩家長輩意見分歧 趙家賢唔敢生B
通常結完婚，唔少夫婦都會被催生仔，結咗婚五年嘅東區區議員趙家賢都唔例外，唔止屋企人，就連街坊都緊張埋一份，齊齊催佢快啲生BB。話雖如此，趙家賢就話老婆都準備好，但係自己就仲未ready喎。到底箇中有乜嘢原因呢？
好彩老婆體諒工作忙
唔少父母都會喺教小朋友嘅時候出現分歧，搞到鬧晒大交，但趙家賢就解釋，話唔係怕同老婆因為教小朋友而鬧交，反而係擔心兩個家庭嘅長輩，話怕佢哋教小朋友時出現意見分歧喎，所以就未準備好生仔嘞！雖然講就咁講，但佢話依家兩家人相處好融洽，而且又冇出現婆媳糾紛。講開又講，本身佢係調解員，到時就算有問題，相信佢都會識得點處理嘅！
唔止怕屋企人有意見分歧，佢話本身工作都好忙，唔止區議會，仲有業委會同民主動力協調工作等等，最近兩星期仲忙到返屋企嘅時候，老婆都已經等唔切瞓咗先。
此外，佢仲透露，話早幾年同老婆度完蜜月之後，已經冇再去旅行喇，好彩老婆都體諒佢工作忙，冇詐佢型咁話喎。