政情：靳埭強叫年輕設計師唔好做爛市
好多後生仔都話喺香港做設計真係搵唔到食，人稱「設計之父」嘅本地著名設計大師靳埭強早前出席香港設計委員會成立五十周年暨D-Awards頒發典禮時，被問到依家成日有啲人叫年輕設計師抵得諗，遠低於市價去做設計，佢認為如果朋友幫手或慈善就冇所謂，商業嘅就應該拒絕做，否則會做爛個市，香港個市喺回歸第一個十年已經爛咗，自己以前都係爭取合理待遇。
籲去內地發展
靳埭強話自己好彩，喺回歸前已探索內地市場，二○○二年就開深圳分公司，建議年輕人去內地做設計，但好少香港年輕人願意去內地，可能因為整個香港社會都唔鍾意去其他地方發展，有少少抗拒，認為年輕人唔應該困住自己。
佢話近十年內地品牌已經比較有實力，知道設計嘅價值，亦畀到好嘅設計費用畀設計公司做高水準設計，年輕人到內地學完嘢後，可以選擇創業，內地市場大，有好多生意機會。