政情：指甲有菌含膿 謝偉銓手指公包到一大舊
尋日喺立法會遇到建築、測量、都市規劃及園境界議員謝偉銓（Tony），見佢左手手指公包到一大舊。點解搞成咁？佢話，之前指甲內有個傷口，搞到細菌感染，有時會腫，但又好快消腫，佢成日都要開會，太忙加上忍得痛，一直冇理，點知指甲內開始有膿，變咗綠色，仲傳出氣味。
傷口仲有瘀血
咦！唔多妥喎。佢話發現變成咁就覺得唔可以再拖，有日趁醫院夜晚少人就去睇醫生，醫生開藥畀佢食，上星期再覆診，醫生都要佢繼續搽藥膏，依家已經好番好多，只有少少瘀血同少少黃，但礙於外出會接觸到好多細菌，所以佢話都係包住穩陣啲。
