政情：陳凱欣九龍有物業 選舉捐贈未交代
立法會九龍西補選勝出並已宣誓就任議員嘅陳凱欣，佢嘅個人利益申報出爐，申報咗喺九龍區擁有物業，至於受薪董事、受薪工作、公司或其他團體股份權益等，統統都揀咗「否」，但備受關注嘅選舉捐贈呢部分，就只填上「稍後提供」，未有交代。
財政贊助揀咗否
喺補選中獲建制派全力支持嘅食物及衞生局前政治助理陳凱欣，喺選舉期間獲建制派總動員站台撐場，到底人力物力點樣計，佢仍未有交代，喺選舉捐贈一欄只係留下「稍後提供」，至於財政贊助、從香港以外嘅政府或組織或非香港永久性居民人士中收受款項、實惠或實利呢幾欄，佢就斬釘截鐵咁揀咗「否」。