政情:59白鴿退黨轟林卓廷無政治道德

民主黨(白鴿黨)內訌爆不停,終於爆發退黨潮。同屬新界東支部的五名區議員,聯同早前捲入「雙牌頭」風波嘅將軍澳民生關注組主席柯耀林同埋社區主任等五十九人,尋日宣布退出白鴿黨。其中柯耀林、沙田區議員丁仕元、大埔區議員區鎮樺、北區區議員劉其烽等人嘅聯合聲明中,狠批該黨嘅立法會議員林卓廷人格卑劣、態度專橫、毫無政治道德可言。

今次退黨潮牽涉五十九人,當中有十九人係區議員同社區主任,其中只有東區社區主任谷傑斐係屬港島支部,其餘都係屬於新界東支部。區鎮樺透露,另外仲有十幾人亦計劃退黨,但唔會依家退黨。同樣決定退黨、剛卸任黨副主席嘅沙田區議員李永成、區議員吳錦雄同沙田社區主任張宇添就另外發聲明,指近月該黨新東支部出現嚴重分歧,所以決定退黨,希望可以投放更多時間服務市民。

柯耀林力數林多宗罪名

柯耀林等人喺記者會中力數林卓廷多宗罪,提及白鴿黨同將軍澳民生關注組喺將軍澳區撞區事件,指林派出分屬友好嘅莊榮輝空降都善選區,同時亦將自己嘅助理放入協調名單上,批評林製造人為撞區。佢透露除都善選區,仲有另外兩區受影響。柯仲話各區嘅關注組都係由地區人士成立,有部分白鴿黨黨員都參與其中,佢質疑當中係咪都牽涉雙重會籍問題。

早前新東支部選舉出現疑似派系鬥爭事件,區鎮樺喺記者會上就批評,支部一共有九個職位,佢哋只派出四人競逐,而林卓廷一方就派出九人,批評林有意壟斷支部嘅話語權。另外佢亦批評林喺支部選舉中曾經挪用會員資料,私下聯絡會員。而喺北區區議會方面,區議員劉其烽直言同林嘅理念、做事風格截然不同,批評佢喺區內投放時間唔多,仲狠批林「只談私家倫理、漠視程序公義」。

林:「雙牌頭」非個人決定

喺記者會後,林卓廷發聲明批評指控嚴重失實,仲話「雙牌頭」事件係根據黨內機制共同決策,唔係個人決定。該黨前主席劉慧卿更鬧爆退黨人士有計劃人格謀殺林卓廷,仲呼籲佢哋停止抹黑。現任黨主席胡志偉嘅聲明就較為平和,話會尊重佢哋嘅決定,又指黨內有機制公平解決黨內矛盾,可惜未能化解當中嘅不滿。

今次退黨事件搞到滿城風雨,退黨潮仲可能陸續有嚟,唔知白鴿黨點收科?

第一手消息請下載on.cc東網iPhone/iPad/Android/Windows Phone Apps