中環出更：郭家麒斥山頂纜車為香港之恥 陳百里做箭靶

山頂纜車喺今年十月獲批第二個十年經營權，同時又獲批額外使用三幅位於纜車軌道範圍旁嘅政府土地，以落實優化發展計劃。尋日相關嘅附屬法例就交畀立法會省覽，郭家麒於是就大鬧一餐。

郭：任其魚肉乘客 行徑倒米

佢就話纜車乘客好似豬仔咁企喺度等上車，唔知等幾耐，車錢又唔平，如果善待乘客就唔會年年月月日日任由佢哋淋雨，所以做幾多推銷都無用，完全係趕客。鬧完纜車又鬧政府，佢話政府批完專營權後又唔理，任其魚肉乘客，行徑倒米，質疑政府係咪要繼續睇住旅客同港人喺咁惡劣同極不人道環境下等車，大彈纜車係「香港之恥」囉，而政府只係口講旅遊業，實質趕客囉！

鬧得咁甘，陳百里喺回應時都特登話有聽到郭嘅意見，就話纜車公司已經做咗排隊相關嘅安排，希望透過增設法例盡快開展同完成有關工程，而政府亦都會密切監察進度，做番好啲山頂旅遊服務喎。

卓妮