雨果講過：「所謂政治家，有時也就是民賊。」睇吓香港班政棍就知所言非虛，佢哋呢頭當正選民係老闆，嗰頭呃公帑攞着數自肥無所不用其極，夥計穿老闆櫃桶底，唔係「民賊」又係咩呀！
大家有眼見，每逢立法會換屆，例必吸引一大批區議員削尖腦袋走去參選，如果以為班友真係滿腔熱誠服務市民，咁就太傻太天真嘞。本報翻查前年嘅區議會開支紀錄，發現候選人聲稱用於選舉用途嘅申報比例，由百分之三到三十都有，基本上等於議員是但噏，話中間冇人趁機報細數，濫用公帑公器私用，三歲細路都唔信。
正所謂蒼蠅不叮無縫的蛋，民政事務總署既冇為申報比例劃線，區議會秘書處亦只係循例「溫馨提示」，叫區議員自行按比例申報，咁即係等於為佢哋上下其手開方便之門。你知喇，香港班政客冇嘢叻，最叻就係舔着數，區議員涉詐騙津貼，立法會議員黑金「袋住先」，沒有最離譜，只有更離譜，家陣無王管，仲唔更加有恃無恐咩，咁搞法，唔單止選舉透明度受影響，政客亦可利用政府資源幫自己搞選舉工程，對其他候選人唔公平。
真係諗極都唔明，區議會同立法會選咗N咁多屆，「雙料議員」亦唔係新生事物，為乜到依家申報制度仲係冇規冇矩冇監管o架？特別係區議員，除咗選立法會申報開支有灰色地帶，之前本報亦曾踢爆，市民想話查閱區議員開支申報要過五關斬六將咁滯，又要填《公開資料守則》表格，仲要親身遞交，否則唔可以查閱，遮遮掩掩臭屎密冚成咁，擺明有蠱惑喇。
都唔知話民政事務總署班官老爺瞌眼瞓吖，定抑或覺得庫房水浸，幫手散啲出去益吓班政棍。有學者就講得啱嘞，民政署作為管理區議會嘅部門，監察區議員點樣運用公帑，責無旁貸，即使唔要求參選區議員劃一申報選舉開支，亦可以直接扣減議員辦事處嘅一半租金，甚至唔准喺區議員辦事處進行選舉工作都仲得，總而言之辦法總比困難多，爭在官老爺有冇心嘅啫。不過嘥氣喇，民政署官僚連十八個區議會嘅申報制度都搞到「一港十八制」亂晒大龍，旨意佢哋顧埋區議員選立法會嗰瓣，蚊都瞓蛇都死！
講起上嚟都幾諷刺，政府追收市民寄信貼少一毫子郵票都追到天腳底，偏偏對班政棍鬼咁慷慨，唔通諗住今日留一線，他朝好相見？一滴水睇穿整個世界，議員申報制度千瘡百孔，形同虛設，只係官場腐敗嘅冰山一角，公帑使得不明不白，納稅人冤過竇娥事小，打殘香港「廉潔之都」嘅金漆招牌嗰度大鑊！