林鄭日前出席撲滅罪行聯席會議，高度讚揚警隊在撲滅罪行方面取得驕人的成績，佢又話本港治安處於相當理想的水平，市民可安居樂業云云。是否如此，套用官場用來回答記者詢問嘅一句廢噏：有關問題好難講，見仁見智喇！老朽若居於油尖旺、深水埗或元朗一帶，對林鄭的「市民可安居樂業」必然嗤之以鼻！南亞賊打家劫舍、鬧市追斬時有所聞，單是「假難民」都搞到香港治安雞毛鴨血。
林鄭及一眾高官的管治水平，着實叫人不敢恭維。說香港是「宜居城市」，未免掩耳盜鈴。認真探討起來，政府縱庫房長期水浸，然而，在覓地建公屋上一籌莫展，基層等上樓愈輪愈長，家陣平均要等超過五年，已遠離政府「三年上樓」的目標。林鄭捨近求遠，不利用百多間的空置校舍或丟空的街市等，情願去大搞「明日大嶼」，計劃確係「燃點希望」：讓等上樓嘅劏房客睇到二、三十年後的海市蜃樓！
至於林鄭吹噓的「法治」，如何考驗香港的「宜居」標準，那就更是笑話一大籮；譬如話對佔中期間的四十八個主要搞手全部「預約拘捕」，溫柔到好似情人約會，結果係搞手紛紛「踢保」，至今只有九人被控，包括漢奸黎在內的其他三十九人仍然逍遙法外，而漢奸黎涉刑恐東方男記者一案，律政司一味虛以委蛇，例牌敷衍玩包庇，連「告唔告」都答唔到，如此又如何叫人相信司法的公平正義？香港的「法治」，是否如東方員工的質疑：要變反對派方會獲蔭庇？何以「凡東方必打壓，逢蘋果例免責」？這是法治的「考驗」抑或是法治的「墮落」？
講多冇謂，食多會滯。講番「宜居城市」安居樂業嗰筆：政府扶貧無能，高官唔肯認真檢討，只係一味話「愈扶愈貧」係歪論，阿哥，家陣有唔少長者等唔到政府的安老院舍而含恨而終；如今連睇公立醫院急症，病人都等到死！你話香港是「宜居城市」還是「悲情城市」多啲？