政情：白鴿黨 搞街坊團經大橋 疑鬼祟縮細黨徽
唔少大型基建項目如港珠澳大橋喺今年內啟用，地區人士都紛紛趁機搞街坊團，不過呢啲項目喺議會上曾遭泛民主派反對，所以泛民搞呢類街坊旅行團都幾尷尬。最近又有民主黨（白鴿黨）地區人士搞相關活動，不過就被批評行徑鬼祟囉。
黨內有提醒低調處理
上月白鴿黨嘅沙田區議員吳錦雄搞旅行團，標榜一次去晒兩個基建，結果換來建制陣營批評「身體最誠實」。吳當時接受訪問時話，黨內有提醒過應低調處理，好似搵居民協會主辦。
不過最近又有讀者發現，荃灣社區顧問黃湛聯宣傳中山珠海兩天遊嘅海報，旅行團會經港珠澳大橋去珠海，更形容大橋為「海上巨龍」、「世紀工程」等，而海報當眼位置就寫上福來邨居民聯會同荃灣康樂會。不過最鬼祟就係，黃湛聯嘅相片隔籬，有一個極不顯眼嘅白鴿黨黨徽，唔通就係聽黨呼籲低調處理？