政情：立法會新廚神 柯創盛半粒鐘煮三餸一湯
今屆立法會不論泛民定建制派都有唔少隱世廚藝高手。立法會議員柯創盛（柯仔）就由細煮飯煮到大，喺小學六年班已經煮飯畀成家人食，唔少家常菜都難唔倒佢。柯仔仲話，唔計準備食材嘅時間，最快可以喺半個鐘之內煮出三餸一湯，認真犀利。
雖然可以「光速」煮飯，不過柯仔就話做咗立法會議員之後，成日要喺金鐘同觀塘兩邊走，做完立法會事務就要落區做番區議員工作，所以已經有一段時間冇煮飯喇。佢煮飯嘅秘訣就係最緊要識煮，反而啲食材唔使一定要靚。咦，唔通係化腐朽為神奇？
買餸（目及）實 慎防被呃秤
煮開飯嘅柯仔笑言最鍾意行街市買餸，唔好以為佢去得多就好熟架步。佢話試過有啲街市阿姐見佢四眼仔，以為佢好易恰，其實佢除咗練成數口精之外，仲會落足眼力（目及）實，例如買海鮮時會睇吓有冇被人倒埋啲水，或者買菜時望實個磅，慎防被呃秤喎！既然立法會有咁多廚神，唔知幾時可以嚟個大比併呢？