政情：傳九龍塘重置展亮議員鬧爆黑箱作業

回信唔講重置問題

據聞勞福局喺回覆該名民主派議員嘅信中，只係回應話會喺市區覓地重置，亦會同職業訓練局商討新嘅服務模式，同埋同受影響嘅家長、學員及員工溝通，字裏行間冇提會唔會同該議員會面。該名議員批評，政府咁嘅做法係黑箱作業，對受影響嘅人士唔尊重，兩個月嚟都冇搵過受影響人士同埋議員溝通，做法好難令人接受。

身為立法會福利事務委員會主席嘅鄺俊宇就質疑，勞福局迴避問題、歎慢板，只會玩殘一班殘疾人士，釀成「局長危機」。佢認為，「醜婦終需見家翁」，政府應為殘疾人士諗多步，盡快開誠布公。社福界立法會議員邵家臻就批評當局係閉門造車，呢頭聲稱重置嘅展亮係「加強版」，但係另邊廂又唔肯公布更多詳情，覺得局方根本係重門深鎖。

雖然政府對重置展亮嘅選址唔肯漏口風，不過有民主派立法會議員就繼續追殺，尋日建築署回應議員查詢時就話，勞福局建議喺九龍塘牛津道空置校舍進行改建工程，係配合一間綜合職業訓練中心嘅裝修工程，初步預算要近三千萬港元，預計二○二一年完成。建築署都唔肯明講呢個綜合職業訓練中心就係展亮，但係外界都估計就係嘞！

新址更舊 地點吊腳

政府迫遷展亮嘅理由之一係建築物太殘舊，係時候重建，邵家臻就話，展亮現址建築物有五十年歷史，但係牛津道嘅舊校舍有五十幾年歷史，仲舊過觀塘展亮現址，再加上疑似新選址嘅地點比較吊腳，質疑有邊方面優化喎。

上述幾位議員都揚言會繼續追殺政府，同時會自行同持份者研究新中心嘅硬件同軟件。搞到咁大鑊，睇嚟勞福局今次真係自製危機喇！