中環出更：捐建藏醫學校楊勳講佛偈種好因得善果
香港人樂善好施，連遠在天邊嘅青藏高原上，都有港人行善嘅足迹。一向低調嘅香港惠州社團總會榮譽會長楊勳，早前帶埋家人齊齊現身一個慈善素宴，為位於海拔四千多公尺高嘅四川省德格縣佐欽一間藏醫慈善學校籌募擴建經費。楊勳仲大開金口講佛偈，教大家「種好因」，先至會「得善果」咁話。
卓妮平時聽楊勳嘅哥哥、中華總商會永遠榮譽會長楊釗講佛偈聽得多，少啲慧根都聽唔明。楊勳就笑笑口話，自己皈依廿五年，不時聽到有人話佛教好深奧，其實唔係，佛教就係日常，「因果循環」係鐵一般嘅規律，只要大家理解呢個道理之後，就身體力行去「種好因」，咁就係佛o架喇！
張鍾麗裳撐傳承文化
呢間佐欽藏醫學校三年前獲得楊勳嘅大筆捐助後動工，依家仍需部分後期資金。收藏家張鍾麗裳（Lisa）都好支持起藏醫學校，因為當地人口唔多，醫療設施欠奉，學校唔止可以培育醫護人員，為高原上嘅居民治病，仲有助歷史悠久嘅藏醫藏藥傳承下去，對於保護藏族文化相當重要。雖然學校係由當地一位仁波切發起，但係Lisa話，支持藏醫藏藥唔應該分宗教及年齡，好似佢係基督徒，但一樣支持佛教。
同場仲有中華廠商聯合會副會長陳國民、香港東區各界協會會長朱浴龍及善德基金會副主席洪光汜，朱浴龍同埋洪光汜都大力競投拍賣品以示支持。唔係佛教徒嘅陳國民同呢位仁波切都好有緣，事關多年前經朋友介紹認識之後，咁啱對方嘅香港道場要搬遷，當時陳國民喺土瓜灣嘅公司總部工廈剛剛買下多個單位，佢就用一蚊象徵性租金租畀道場使用，難怪佢笑稱係「緣分天注定」喇！
卓妮