最近城中有喜事，中華總商會常務會董余國春就嚟飲新抱茶，佢個仔余偉傑同女友Emma下個月將拉埋天窗，好多政商界老友一見到佢就連聲恭喜，難怪佢人逢喜事精神爽。Emma嘅爸爸係葵青區議會前主席方平，余國春笑言個仔搵到另一半，好開心，仲話同方平係相識多年嘅老友，佢自己係客家人，方平就係潮州人，正所謂「潮客一家親」，依家親上加親，真係有緣咁話！
