政情：八網難逃：大晒新買喇叭 盧偉國：好彩老婆冇鬧

工程界立法會議員盧偉國鍾意入廚，經常喺網上大晒自己煮嘅餸。不過「盧家私房菜」尋日就變成「盧家私房音樂」，改為大晒佢最近新買嘅喇叭。佢話個喇叭訂咗半年先到貨，佢即刻拎唔同種類嘅雷射唱碟嚟試，包括古典、爵士、流行曲、中樂、粵曲、日文歌及國語歌等等，試完猛讚啲聲好有立體感，發聲方式都交代得好清楚，聽到唔想停添！佢仲話好彩套喇叭嘅外殼同屋企嘅布置好夾，所以老婆冇鬧，仲講笑話，HiFi發燒友入貨，最緊要過到老婆嗰關喎！