中環出更：懶理無殼區議員 張建宗齋講唔做
政務司司長張建宗（小肥張）尋日出席新民黨離島區議員傅曉琳（Sammi）辦事處嘅開幕禮時，講起知道Sammi多年都開唔到辦事處，曾答應話如果有日佢嘅辦事處開幕，一定會到賀，所以今次係履行諾言。雖然小肥張呢番說話得到現場嘅掌聲，但不禁令人諗起，仲有幾位區議員係無殼蝸牛，未有辦事處，到底佢有冇做啲嘢去幫吓佢哋呢？
認叻話超標完成18區區訪
小肥張致詞時先係認叻，講起近日去咗大埔區做區訪，完成咗問責官員兩年內走訪十八區嘅流程，形容自己早咗半年零兩星期達標，係超標完成喎，所以有好多時間可以提早展開第二輪。佢又講起，之前去離島區議會，知道Sammi冇辦事處，拉住易拉架、一張枱同一張櫈咁去接觸市民，自己當時好感動咁話。
其實仲有唔少區議員都冇辦事處，例如深水埗區議員袁海文，至今仍然係無殼蝸牛，就算Sammi今次新開辦事處，都幾經辛苦才抽籤抽中。小肥張淨係講句好感動，其實到底有冇咩好方法幫吓呢班「流落街頭」、搵唔到地方開辦事處嘅區議員呢？
卓妮