中環出更：內地非洲豬瘟勢兇 梁志祥撐食本地豬
內地非洲豬瘟肆虐，隨時威脅供港豬肉安全，都咪話唔擔心。不過立法會議員梁志祥（祥哥）就話對香港唔會太大影響，但係為咗安全起見，佢購買臘肉同臘腸等豬肉製品時，都會購買本地豬肉出品嗰啲，佢仲力撐本地豬，話如果食盆菜都會採用本地豬，因為本地豬比較瘦、但口感又腍啲，相對會健康啲咁話。
祥哥一向鍾意食盆菜，近日仲拍咗段介紹盆菜嘅短片，片中就提到盆菜喺香港家傳戶曉，更獲列入香港非物質文化遺產代表作名錄。祥哥又話，盆菜始於南宋時期，當時北方人逃難嚟到南方，南方人就將所有好食嘅嘢放埋一齊分享，結果獲北方人大讚，從此打響名堂。
顏汶羽倡政府津貼青年學做盆菜
片中又提到傳統盆菜有筍蝦、魷魚、蘿蔔、枝竹、豬皮同豬肉，反而冇依家盆菜中常見嘅雞、鴨同魚蛋，而當中豬肉好唔好味就最重要。祥哥話，新界嘅盆菜都係用本地豬肉，因為肉質比較瘦，但口感夠腍喎。而有份拍片嘅仲有觀塘區議員顏汶羽，顏就話，為咗確保盆菜呢門本地特色手藝後繼有人，政府應該為願意投身學做盆菜嘅年輕人提供津貼喎。
卓妮