港產官僚開口埋口「高齡海嘯」殺到埋身，一時話要延長退休年齡，一時想收緊領取福利門檻，家陣又建議提高強積金自願供款及延期年金可扣稅上限，美其名曰鼓勵市民未雨綢繆，儲多啲錢，實際上巧言令色，無非推卸安老責任，講到尾就係縮骨！
係咁嘅，當局建議將有關最高扣稅總額，由原定嘅三萬六千蚊大增至六萬蚊，並將適用範圍擴大至涵蓋納稅人為配偶而繳付嘅延期年金保費。以單身及繳交百分之十五標準稅率嘅納稅人為例，可節省九千蚊稅款，較原來建議上限所節省嘅五千四百蚊多出六成七；而月入六萬蚊嘅單身人士，原建議之下可節省六千零蚊稅款，新建議則可節省過萬蚊，似乎幾和味喎。
不過咁，不近情者多藏奸，港府一向算死草，今次畀咁多着數，諗都諗到有古怪。所謂嘅延期年金，係就係比港府早前吹噓嘅公共年金較有彈性，回報亦可能較高，但弊在唔係即時收錢，投保人要將供款交畀保險公司滾存投資，若干年後先可以領取回報，即係話愈後生投保愈着數，對於最需要退休保障嘅長者則完全唔關事，嘥氣也。
至於強積金咯喎，出名回報低手續費高，七除八扣得番雞碎咁少，根本冇辦法食過世，結果推出咁耐，畀人鬧足咁耐。家陣鼓勵打工仔喺強制供款以外作出額外供款，增加儲蓄，原意唔係唔好，但做啲唔做啲，冇解決手續費過高問題，何況好多打工仔上有高堂下有子女，住屋開支更加唔嘢小，每個月都左支右絀掹掹緊，想港府取消強積金供款都嚟唔切，仲邊有咁多閒錢額外供款吖。
所以話，港府整色整水，搞喱搞路，其實曲高和寡，受惠嘅只係富貴人家，基層人士就關人個關。若然官老爺真係關心市民退休生活，真係想長者老有所養，最簡單嘅方法就係推行全民退保。唔係咩，港府嘅安老政策天殘地缺，所謂嘅「三條支柱」，其中兩條嘅個人積蓄同埋強積金，即係貴客自理嘅代名詞，剩番一條社會保障安全網，同樣諸多設限。搞到冇嘢好搞，推出甚麼銀色債券、富貴長者屋、住所逆按揭等等，名堂多多，但同年金一樣只係錦上添花，唔係雪中送炭。基層長者始終自生自滅，甚至連增加資助宿位都係光說不練，搞到七老八十仲要揸的士、執紙皮維生，你話港府唔係推卸安老責任都冇人信喇。
講番今次嘅提高扣稅上限，港府講明入息相對較低嘅納稅人唔會受惠，再次反映嫌貧愛富嘅涼薄本性。所以話，官僚靠得住，豬乸會上樹，打工仔想無後顧之憂，不如買多兩期六合彩博一博！