職場健康：辦公室伸展運動 助緩工作壓力
「唉，每日都做到無停手，差啲連食飯時間都無，點解我嘅體重仲不停升？」美美在位上嘆氣，旁邊的同事阿怡說︰「其實每日長坐辦公室，長期缺乏運動，唔肥都坐到肥啦。你又要接觸唔同客人，工作壓力大，好多時將工作負能量帶到餐桌，大量進食，而且我見你傾向選擇垃圾食物，好似炸雞、汽水、雪糕等。就係咁，你一日一日變肥。」
美美一股悲傷的情緒湧上心頭，對貪靚的她來說，工作壓力和肥胖是致命打擊啊！阿怡安慰：「其實係有方法改善。第一，長坐唔止肥，亦會影響血液循環，增加患心血管病機會。良好嘅時間管理好重要，例如妥善計劃工作緩急先後，唔好將所有Deadline一日內完成，要定出合理時間完成各項工作。我每日都會喺工作間做伸展運動，舒展吓筋肌有助紓緩壓力。另外，善用日常機會多做運動，例如多行路同樓梯、做家務、或早一點起床、午膳或晚飯前做運動。」
學鬆弛技巧 建正向心理
「第二，要積極面對工作壓力，同同事上司討論解決方法；同時學習鬆弛技巧，放鬆身心。唔好化壓力為食量，逃避受壓情緒，因為咁樣可能會暴飲暴食，或吃更多零食引致健康問題。要建立正向心理增加面對壓力扺抗力， 所謂『相由心生』，保持心境開朗，自然人都靚啲同Fit啲。」
美美立刻拉着阿怡：「不如你即刻教我幾招辦公室都可以做嘅伸展運動呀！」（見圖）
職業安全健康局
www.oshc.org.hk