西諺有云︰行動比說話更加響亮。尋日係「國家憲法日」，特衰政府同舊年一樣，門面工夫做到足，繼續舉辦座談會，官老爺口口聲聲「完善特區同《憲法》和《基本法》實施相關的制度和機制」，一副忠心愛國嘅架勢，實情係律政司有法不依，對天字第一號漢奸洋奴賣港賊明縱暗放，淨係對漢奸黎涉刑恐東方報業記者案拖足十八個月唔處理，就知佢哋眼裏既無「憲法」，更無「國家」。
律政司司長鄭若驊民望長期尋底，早有「墊司底」之名，證明市民嘅眼睛雪亮。鬼咩，喺佢「英明」領導下，律政司唔係捍衞法治，而係帶頭葬送法治。漢奸黎粗口辱罵兼恐嚇記者，全程有相有片，吟詩都吟唔甩，律政司手握檢控大權，居然遲遲唔肯將漢奸黎落鑊，唔係包庇邪惡又係咩呀！
東方報業集團旗下《on.cc東網》時事評論節目「阿王辣爆」主持人王國興就講得啱嘞，受害記者唔係第一次，而係第十一次去信律政司要求交代檢控進度，律政司次次官話廢話連篇，一味以「徵詢法律意見」、「不評論案件」嚟迴避，以虛詞帶人遊花園，擺明違反自訂嘅《罪行受害者約章》裏面，十四天內回覆受害人嘅服務承諾。堂堂政府自毀長城，仲講咩捍衞法治、捍衞新聞自由吖。
講起上嚟都唏噓，林鄭呢頭大講特講「法治係香港最重要核心價值」，嗰頭就同反對派玩「大和解」，更搵着一個知法犯法嘅人主掌律政司，咁就難免令人質疑到底係咪買咗漢奸黎背後外國勢力嘅怕，係咪有份豁免刑事檢控嘅名單，而漢奸黎正正係榜上有名？定抑或鄭司長故意放水，換取反中亂港傳媒唔再狙擊佢嘅大宅僭建醜聞？
事實勝於雄辯，回歸以來，「愛國愛港一仆一碌，反中亂港招財進福」儼然成為特區主旋律，律政司對愛國愛港者判決從速從嚴，對反中亂港者就網開一面，佔中期間，向漢奸黎掟豬雜嘅三義士、執行職務嘅七警同朱前警司受牢獄之災，反觀漢奸黎刑恐記者，公然踐踏新聞自由，港府卻大歎慢板。有人形容以漢奸黎為首嘅牛鬼蛇神十足十攞咗古代嘅丹書鐵券，計功夫茶話齋，以前嘅免死金牌唔包「大逆」、「謀反」，家陣香港班漢奸公然播獨分裂國家，一樣毫髮無損，簡直恨死古人。
一句到尾，香港地港英餘孽同洋奴漢奸當道，正義傳媒備受打壓，維權無門，冤過岳飛，慘過竇娥，唔通真係要逼到東方報業參與反中亂港大合唱，先至可以得到當局嘅庇護？