政情：八網難逃：波叔以波遮面 為預算案賣關子？
庫房嚴重水浸，財政儲備創歷史新高，今年初財政預算案嘅措施被指係重中產、薄基層，簡直就係亂咁嚟。眨眼間又係時候準備新一年嘅預算案，財政司司長陳茂波（波叔）尋日就開咗個新專頁，仲上載新相以波遮面，唔知波叔遇上波，究竟搞邊科？
似拍片公開收集市民意見
波叔喺專頁上載新相，見到佢手執一個純白嘅波遮住塊面，企喺一個木箱之上，似係拍緊短片，唔知佢會拋波、射波，抑或接波呢？另一張相就由一位好可愛嘅妹妹，喺波上寫上「親愛的波波」，真係鬼咁肉麻，估計嚟緊會學似早前嘅施政報告，公開收集市民意見。不過，點搞都好，最緊要唔好再學舊年咁亂射波就得嘞！
回帶睇番，今年初嘅財政預算案有多項令人質疑嘅建議，例如豪花逾三億港元向中、小學生派發一萬張免費海洋公園門票，卻聲稱報稅表「趕不及印」而未有推行租金稅務寬減，仲因為遺漏多個組群遭各界抨擊派糖不均，港府隨後補鑊指會透過關愛基金作「補漏拾遺」向市民派錢，但至今仲未袋落袋。