中環出更：林正財笑凌嘉勤 做官唔提雙老化威脅
香港人口老化問題嚴重，政府聲稱將要面對「高齡海嘯」，但係規劃署前署長凌嘉勤同身兼安老事務委員會主席嘅行政會議成員林正財，都話香港社會未準備好照顧長者，間接批評政府嘅長者政策未做好。其中凌更話樓宇老化同人口老化關係密切，批政府將兩個問題獨立處理，林就笑凌：「點解你做官員時唔提出？」
凌不滿城市規劃無法照顧長者
凌嘉勤同林正財尋日出席一個以長者與建築共融為主題嘅活動，凌指香港正面臨「雙老化」威脅，即人口同樓宇同時老化，指到二○四六年樓齡達七十年嘅樓宇數目將會係依家嘅三百倍，要去重建就會面臨業權分散、單位密度高嘅問題。佢又話城市從來唔係為老人家去建設，因為「告老還鄉」，退休就回鄉，但係香港人退休就住番喺度，佢不滿政府將人口同樓宇老化兩個密切議題分開獨立處理，令城市規劃無法照顧長者。
林正財認同凌嘅講法，仲舉例話住沙田有海濱公園自然想跑步，住油尖旺人多車多連落街都唔想，抱怨凌點解擔任公務員時唔提出上述建議。林又認同社會政策偏重年輕人同兒童，形容香港人係「長壽而不健康」。
卓妮