中環出更：馬清楠籲多運動「儲錢」投資年老健康
雖然香港嘅冬天愈嚟愈短，但本周末就會天氣轉冷，相信唔少人又會諗起食蛇羹、羊腩煲等補身喇！不過，保良局副主席馬清楠早前出席一個活動時就話，從來都唔建議人食太多補品，要有效保持健康嘅竅門係做運動，仲話如果人老咗一係食補品，一係做運動，佢一定會揀做運動，所以佢成日同人講「做運動就係儲錢」，後生唔儲，老咗就冇得用，藉以鼓勵多啲人「儲多啲錢」。
馬清楠以前讀書時係壁球校隊，所以到依家都會定期打壁球，佢成日聽到啲人話收工好攰，所以唔做運動，但佢強調唔做運動就仲攰，所以幾攰都應該要逼自己做。唔單止係運動，佢平時返工開會都多數企喺度，練吓腳力，話人老咗最容易出事就係對腳，所以得閒就企多啲、練多啲，咁身體就健康啲喇！
轉頭見到香港潮州商會青年委員會委員李嘉莉、食物及衞生局前局長高永文同香港潮州商會副會長蔡少偉。李嘉莉話蛇羹、羊腩煲、煲仔飯等都會食，但主因唔係補身，而係鍾意食，所以佢每年都係「冬天增肥、夏天減肥」，事關熱愛運動嘅佢特別鍾意水上活動，所以夏天減肥就最適合不過。佢仲話早前參加咗「斯巴達障礙賽」，其中一部分要跳火圈，佢初初以為啲火係假嘅，點知一跳完就感覺到好熱，先知啲火係真o架！
胡炎松呻近年蛇羮唔足料
講起補身，香港潮屬社團總會常務會董胡炎松就投訴近年啲蛇羹愈嚟愈唔足料，好多時都混咗好多雞絲、肉絲入去，佢話如果係足料嘅蛇羹，食一次就足夠頂一年冬天，依家嗰啲多數都唔得！佢又話依家食嘢冇乜季節性，以前冬天食嘅嘢，已經一年四季都食到，就好似以前多數冬天先打邊爐，依家夏天都會打，最多開大啲冷氣咁啫！
卓妮