政情：未婚賴嘉汶 街坊誤會生過仔
唔少女士生完小朋友後，身形都會走樣，所以如果畀人誤會生過小朋友，打擊都幾大。民建聯小花賴嘉汶（Apple）就有咁嘅經歷，之不過佢不但未婚，更加未生過，睇佢外表同身形都冇大變化，點解會有咁嘅誤會呢？
因熟悉小童升學問題
Apple就話，佢服務嘅欣田邨今年先入伙，所以邨內唔少學童有轉校需要，唔少家長問佢有關子女升小學嘅問題，街坊見佢咁熟悉，咪以為佢有親身經驗囉。聽落呢個誤會都唔算太差，至少係街坊對佢工作嘅肯定。
Apple又話，邨內缺乏玩樂同埋健體設施，所以，不時都要為邨內嘅小朋友搞活動，試過畀小朋友叫佢做姨姨添！不過佢就話童言無忌，最重要大家玩得開心。