中環出更：張國鈞講錯人名 同林卓廷論壇駁火

Horace話，報告引述咗好多「香港係人治」嘅說話，來源都係民主派。佢批評美方過去只係搵民主派議員見面，咁做唔會平衡到兩邊意見，如果美方搵建制派議員，佢會隨時歡迎。講講吓，佢話「佢（美方）唔搵我，剩係搵林卓廷，跟住份報告就落咗林卓廷，我都冇辦法(口架)嘛」。

張批美方只引述民主派意見

同場嘅林卓廷就即刻反駁話，報告入面冇佢個名，係引述咗佢黨友尹兆堅意見，仲話啲內容其實係公開評論嚟。Horace即刻就話：「我都有好多公開評論，又唔見佢引述吓我！」

林卓廷就解釋話，議員同外國領事或議員會面，係職責所在，而且民選議員係接受市民監察，結果亦會喺選舉上反映到。佢仲話，立法會有個議會聯絡小組，定期都會同外國國會見面，而且仲有建制派議員出席，不過所講嘅意見，到底啲外國人接唔接受，就係人哋話事喎。

卓妮