環保係大勢所趨，市民亦唔介意畀少少錢換回藍天，不過提起特衰政府搞垃圾徵費，真係令人把幾火。有鄉村參加試行計劃，結果一試就試出港府要配套冇配套，要監管冇監管嘅老問題，將來垃圾徵費全港實施，亂過亂世佳人都似。
呢，有環保團體前年開始喺全港五十七條鄉村推行試行計劃，教育村民認識垃圾徵費。村民普遍支持污者自付原則，問題反而出喺港府身上。皆因有村民反映，政府三色回收桶容量太小，話咁快就爆滿，加上外判清潔工人一星期先入村一次清理回收桶廢物，搞到村民想做好分類回收都唔得。
大家都知，家居垃圾入面廚餘佔咗唔少比重，但政府至今冇措施回收處理，即係逼市民將廚餘當成垃圾咁丟棄，將來垃圾徵費，市民咪要付出更多金錢囉，既唔環保又掠水，有冇再離譜啲吖。另外，有近一成村民反映垃圾袋太薄太易穿，講到明唔會用，更反映港府閉門造車，從來冇企喺用家立場考慮政策，到垃圾徵費正式推出，問題只怕更多咋。正如「東方報業民意調查」顯示，大部分市民鬧爆港府唔止冇足夠配套支持計劃，仲低估問題嘅嚴重性，可謂一針見血。
咁仲唔止，鄉郊向來係非法傾倒泥頭嘅黑點，好似參加試行計劃嘅西徑村，經常有人半夜三更揸車入嚟傾倒泥頭，村民投訴極官老爺都係闊佬懶理，連一部閉路電視都唔肯安裝。村長就講得啱嘞，非法傾倒泥頭罰款高達二萬蚊都冇乜阻嚇力，將來若亂倒垃圾只係罰款一千幾百，想冇公德心嘅人乖乖守規矩都幾難咯。
冇計嘞，港官頭大冇腦，腦大生草，淨係識得使把口講環保，背後嘅回收配套統統欠奉，除咗磨刀霍霍向市民，就冇第二招。就講最近推出嘅「四電一腦」徵費計劃吖，全港居然只得一間指定回收商提供上門回收服務，結果求過於供，倒瀉籮蟹。至於膠袋徵費變成商家自己袋落袋，更同「取之環保，用之環保」嘅原則背道而馳，你話係咪九唔搭八吖。講真，垃圾回收做得好，唔止環保仲可以生財，好似廚餘經過特別處理，當中嘅有機物就可以轉廢為能，變成再生能源。所以話，港府搞環保有前冇後，雷大雨小，點會有好成績吖。
講到底，港官做乜都係得過且過，搞環保亦唔例外。咪畀功夫茶批中，垃圾徵費最終只會淪為掛羊頭賣狗肉嘅擾民政策嘅咋。其實，香港最大嘅垃圾就係呢班廢官，呢舊垃圾一日唔清除，香港人想見番藍天白雲真係咪使旨意。