政情：八網難逃：粗身大勢玩飄移賽車 容海恩嚇親網友
眾所周知，大肚婆要加倍小心，否則動咗胎氣就大件事，之但係懷孕六個月嘅立法會議員容海恩，竟然仲去玩刺激嘅遊戲，搞到啲網友大為緊張，喝住佢咪玩呀！
仲話要甩尾轉彎
話說容海恩喺社交網站上載張去電競展嘅相，同班Cosplay機械人嘅美女合照，佢仲揸住把道具劍遮住個肚添！雖然張相幾搞笑，但係佢啲留言就嚇親班網友，事關佢話飄移賽車好難玩，仲話要甩尾轉彎。
睇到佢咁講，網友大為緊張，留言話：「你依家唔應該玩㗎喎。」亦有網友話：「粗身大勢，小心甩尾喎。」好明顯係怕佢出事。雖然佢鍾意玩電競，亦都好鼓勵呢項運動，但係傷到自己或BB就唔好喇！聽話喇！