我有正能量：齡聽人生路
常言道書籍可以讓人承先啟後，如果閱讀一本懂得聆聽自己煩惱、同時可以將人生經驗傾囊相授的「真人書」，定會令讀者畢生受用。有團體於一五年開始成立「金齡圖書館」，廣邀各行各業的退休人士成為「真人書」，到全港不同中學與青少年接觸。有別於傳統到校「講talk」，活動將主動權交予學生，由學生揀選他們感興趣的生涯故事，提升他們對未來的想像，進一步了解個人志願。
「到咗退休年紀，人生去到另一個階段，好希望將自己前半生有值得借鏡嘅地方分享畀一班學生知。」今年五十七歲的阿余是醫務化驗師，將近三十年青春奉獻給本港醫護界，每日以專業的醫療知識，經歷着病人的生老病死，亦曾於○三年沙士一役中嘗過「慘痛的勝利」，令他對自己的職業感到前所未有的自豪。歲月如梭，當事業處於收成期之際，阿余卻毅然決定棄醫從商，「為嘅只係想實現細個做老闆嘅夢想，衡量過風險，得到家人嘅支持，我就決定去做。」
阿余這一本「真人書」名為「圓夢」，顧名思義，他最想分享的是自己走出舒適區，追尋夢想的勇氣和故事。
「真人書」供揀章節再分享
不過他坦言，作為一本真人書，始終是由「讀者」揀選想看的章節，「要成功同學生溝通，佢講好過你講，當佢講完自己嘅處境，你就會大概估到佢想聽你講咩，可能係職場上嘅嘢、家庭甚至感情生活。」阿余認為，無論作為一本真人書、長輩或是家長，「聆聽」永遠是打開話匣子的第一步。
學生大讚助覓升學方向
九龍華仁書院中六學生Kelvin今年亦曾「看過」阿余這本真人書，並對他讚不絕口，「本身自己將來都想喺醫療方面發展，阿余嘅經驗幫助咗我好多，令我將來升學揀科甚至搵工嘅方向都清晰咗。」
除了職場經驗，最令Kelvin佩服的是阿余面對困難及壓力時咬緊牙關的精神，「沙士嘅時候我只有兩歲，雖然之後知道呢件事，但親耳聽到阿余當年點樣喺『戰場』上搏鬥，點樣唔可以放棄，你就會同自己講將來遇到逆境嘅時候，一定要好似佢咁堅持先得。」
圖：關萬亨
文：陳名仲