政情：慳成本非洲設廠 顏金煒巧避貿戰
中美貿易戰打咗幾個月，未知幾時先至落幕，好多喺內地設廠嘅商家，已急急腳到東南亞或一帶一路沿線國家設廠，以免夜長夢多。早前見到香港紡織商會永遠榮譽會長顏金煒，佢都去咗非洲埃塞俄比亞起新廠。佢笑笑口話，早幾年已部署去非洲，目的係為咗節省成本，估唔到誤打誤撞，可以避開中美貿易戰添！
比內地平六成以上
顏金煒話內地設廠嘅成本愈嚟愈高，所以要另搵出路，佢曾經考察盧旺達等非洲國家，最後決定喺埃塞俄比亞落腳。當地嘅成本比內地便宜六成以上，十分吸引，但係當地政府對環保嘅要求高，有好多手續要跟，所以到依家都仲起緊廠，預計好快就會落成。
講起貿易戰，生產紗同布嘅顏金煒話自己盤生意仍未受影響，但對內地嘅影響好大，如果唔休戰，明年仲大鑊喎！