政情:鄧家彪帶新女示威 個個怕醜冇聲出

近年有唔少年輕入願意走入社區做服務,連立法會前議員鄧家彪(Bill)尋日去示威都帶埋幾個後生女見人,但佢哋似乎怕怕醜醜未習慣喇!

阿Bill帶同多名服務將軍澳嘅社區幹事到政府總部外請願,話擔心領展進一步出售物業會推高物價,尤其政府有計劃喺將軍澳起新街市,建議政府回購領展出售嘅區內物業,再改建為公營街市更慳時間。

勞氣過後 阿Bill照讚肯落區

不過幾位新人就怕怕醜醜,尤其阿Bill叫咗佢哋發言都無人敢接咪講嘢,最後阿Bill就用頗為嚴厲嘅語氣點名社區幹事黃遠康,再叫佢哋唔好扭擰,睇嚟都係男仔比較大膽啲,而佢講得有紋有路,力數將軍澳買餸難、價錢貴、選擇少,街市物價較其他區貴廿蚊一餐咁話。

雖然阿Bill有啲勞氣,但佢話經驗要累積,後生仔女肯花時間落區已經好難得,尤其現時社會搵工唔難,要有抱負先願意做,而三位女性都係剛畢業,非常年輕,睇嚟阿Bill要過多幾招畀佢哋先得嘞!

第一手消息請下載on.cc東網iPhone/iPad/Android/Windows Phone Apps