政情：白鴿黨立立亂 主席位冇人吼 胡志偉頂多屆
民主黨（白鴿黨）下個月初改選中委會，將會選出該黨新一屆嘅領導層。白鴿黨中人透露，今次黨內改選領導層變化不大，現任黨主席、立法會議員胡志偉好大機會連任，原因竟然係因為主席之位冇人吼，胡志偉惟有頂硬上。因乜解究冇人想做該黨主席，咪就係因為該黨問題多多，包括該黨立法會議員許智峯（峯鴿）黨籍問題、新界東支部嘅糾紛，加上新一屆領導層要面對同處理未來嘅區議會同立法會換屆選舉，有乜差池仲分分鐘要引咎辭職，真係吃力不討好喇！
白鴿黨中委會十二月初舉行換屆選舉，新一屆領導層任期兩年，即至到二○二○年十二月，即橫跨明年十一月嘅區議會換屆選舉同二○二○年立法會換屆選舉兩場大型選戰。該黨司庫、深水埗區議員袁海文早已表明想進修同因為女兒出生，希望多啲時間照顧家庭，所以放棄角逐連任。
區會立會選戰臨近 路難行
有消息人士就透露，該黨副主席之一嘅李永成亦唔會連任，而該黨南區區議員羅健熙同胡就預料會繼續連任。但胡連任並非戀棧主席之位，而係因為該黨有足夠資歷嘅人選並唔多，加上要面對兩場大型選舉，都唔係冇風險。
白鴿黨喺二○一二年立法會選舉大敗，地區直選由原本七席減至四席，新界西派出嘅三張參選名單全軍覆沒，時任黨主席「AV仁」何俊仁引咎辭去黨主席一職。難怪胡都話，如出任新一屆主席就要帶領白鴿黨面對兩場戰役，決定該黨前途，責任比過去兩年任主席大。至於佢係咪會連任，佢就話如果個責任喺佢度，佢會盡力而為，但如果有更好嘅人選，亦樂意接受喎。
峯搶手機 新東糾紛有排煩
不過唔止未來有兩場選舉，白鴿黨內部亦都亂晒龍。峯鴿喺立法會強搶女官員手機嘅「峯搶手機」事件，令峯鴿備受批評，該黨即時凍結其黨籍，之後要點樣處置佢而又令公眾信服都係一個難題。而該黨亦因為新東支部鬧「雙牌頭」風波，引發集體退黨危機，真係一波未平一波又起。不論最終結果如何，白鴿黨內部都必定立立亂，新一屆主席都唔知係平亂先定為選舉出謀獻策先喇！