中環出更：倡女局長全薪產假 何啟明幫陳肇始謀福利?
立法會呢幾日辯論施政報告致謝議案，勞工界議員何啟明前日發言時提到，指假如有女局長喺在任期間懷孕，放產假期間政府會唔會畀足三十多萬月薪人工，之後勞工及福利局局長羅致光笑言，話相信會同公務員嘅做法睇齊。目前問責局長之中，只有食物及衞生局局長陳肇始係女士，莫非何啟明係為對方爭取福利？
羅致光話睇齊公務員
何啟明發言時話，香港考慮產假等家庭友善政策時，只諗點樣平衡僱員同僱主聲音，但係就唔諗吓呢啲措施有無鼓勵市民生育。佢話港府雖然提出將產假增加四周，但五萬元人工以上就只係局部補貼，提到「假如有下一個、另一個女局長，喺生育年齡嘅」，問政府是否認為不值得花大筆公帑，去補貼月薪逾三十萬元嘅局長生B。羅致光之後特別點名回應何啟明，指何關心局長懷孕嘅安排，佢話若果將來發生，相信一定會同公務員做法睇齊喎。
卓妮