中環出更：有機菜遇辣即死李鋈麟蝕晒本
港人愈來愈注重生活質素，追求健康飲食，令有機食品大受歡迎。卓妮早排出席東華三院秋祭大典時，遇到好耐冇見嘅東華三院前主席李鋈麟，佢話卸任後，返內地搞有機農莊，讓更多城市人可以反璞歸真，享受吓農家樂。但佢慨嘆話，原來唔係人人都鍾意食有機菜，每當遇到一種味道時，有冇機大家都冇所謂，搞到喺某啲地區嘅生意蝕晒本喎。
李鋈麟話現代內地人主要以城市人多，年紀愈大就想享受生活，想試吓農莊生活，種吓嘢、餵吓家禽，放鬆心情，所以佢幾睇好內地農莊生意o架！
咁到底有乜嘢味道咁厲害？原來係「辣」！佢解釋，依家潮興食麻辣火鍋，不論放乜嘢入鍋都係得辣味，試過同啲火鍋協會合作，放啲有機菜喺一千間火鍋店內賣，仲要係賣得出先收錢，點知三日後啲老闆打嚟話，啲菜已經變黃，快啲搵人收走喎。佢又話就因為咁，依家逢係食辣嘅地區，好似係四川成都，都唔會打入市場o架喇，而香港又愈嚟愈多人食辣，笑言可能第時有機菜都冇人食。
同場仲見到東華副主席馬清揚同文頴怡。文頴怡都鍾意食有機菜同食辣，但唔會話完全分唔到，讚有機食品味道係相對好食啲嘅。佢仲介紹東華旗下社企「煮餸易」，話平時工作忙，喺社企訂餸菜包好方便，而且食材都係經過挑選，有嘉美雞同健營豬，都算係有機食品，味道係有啲唔同。
鄧明慧食親辣都唔舒服
東華總理鄧明慧同馮敬安都在場，鄧明慧稱較鍾意有機食品，但佢食嘢唔太揀擇，人哋畀咩就食咩，冇特別要求。佢話自己唔鍾意食辣，食親都會好唔舒服，但只係感覺上嘅唔舒服，唔係真係有頭暈身㷫。
卓妮