杜甫寫過首詩叫《客至》，裏頭有兩句係咁講嘅：「花徑不曾緣客掃，蓬門今始為君開。」形容為咗尊重客人，特意將庭院收拾得企企理理迎接賓客。不過，呢啲中國人基本禮貌，特衰政府就唔識嘞，睇吓港珠澳大橋配套未到位就強行通車，世界級工程淪為世界級笑話，都咪話唔羞家呀。
講起大橋就火滾，開通之日起，冇一日唔係亂象百出，尋日星期日又試出現等穿梭巴士嘅人龍，仲要買飛都等成粒鐘，情況仲衰過之前。仲有呀，大橋連一個正規油站都冇，穿梭巴士只能駛去「山寨式油站」入油，失禮死人都係其次，萬一發生火警爆炸，旁邊嘅旅檢大樓同候車處人頭簇擁，隨時一鑊熟都有之。最慘嘅係正規油站要出年先投入服務，即係呢種牙煙情況，市民仲有排受呀，真係多得嗰班係都要倉卒通車嘅官老爺唔少咯。
正如「東方報業民意調查」顯示，大部分受訪者鬧爆港府準備不足又缺乏協調。咁又係呀，當局同巴士公司錯估人流，搞到幾千人打蛇餅等巴士，應變能力差過三歲細路哥。至於大橋垃圾堆積冇人理，洗手間污糟邋遢不特止，「交水費」都要等二十分鐘呀，陰功！澳門同珠海亦都係難兄難弟，唔係求其搵張A4影印紙過咗膠就當指示牌，就係搵塊綠色膠氈冚喺爛地扮綠化帶，弄虛作假成咁，醜怪到冇朋友，港珠澳三地好似約埋鬥肉酸咁，吹脹。
真係諗極唔明，既然大橋咁多配套未到位，做乜仲趕頭趕命趕通車呢？就算禮賓府搞開放日，林鄭都唔會淨係梳好個頭，下身踢對膠拖鞋就出嚟迎接市民喇。何況港珠澳大橋話晒都係國家級工程，三地合計使咗成二千億嚟興建，又吹到係通往世界、連接大灣區嘅「雙門戶」咁舉足輕重，反正大橋工程延誤復延誤，唔爭在等多嗰一陣，搞掂晒配套再通車，好過家陣彩就攞唔到，架就丟到盡，世界「新七大奇迹」淪醜聞咁樣衰吖。
講起港府嘅基建亂象，真係數天光都數唔完。大橋開通冇幾耐，亂象多多，官僚就話需要「磨合期」啫，咁郵輪碼頭啟用成五年，「磨合」夠充足喇啩，咪一樣每逢有郵輪泊岸，就例牌出現遊客塞爆碼頭冇車走嘅奇景？交通接駁問題已經係老生常談，港府連最簡單嘅補鑊措施都唔做，你話「門常開」政府總部唔係垃圾堆填區都冇人信！
所以話啫，港官冇心冇肺冇靈魂，最叻化神奇為腐朽，仲話搞「明日大嶼」填海大庇天下寒士喎，好心官老爺搵塊鏡照吓自己乜料喇！