政情：張雅麗湊仔 受中小學幼園夾擊
香港菁英會副秘書長張雅麗（Carol）尋日同老公黃駿一齊入馬場，適逢係佢哋細仔兩歲生日，Carol講起近日要幫細仔搵幼稚園，明年就到二仔考小學要執個人檔案，加上大仔今年讀中一，中一啲嘢唔同晒，突然多咗好多科目，佢呢排經歷晒幼稚園、小學同中學，真係唔簡單呀！
話已習慣又忙又辛苦
Carol話，就算哥哥讀緊某間學校，都要靠弟弟自己考，學校唔一定收，細仔依家考嗰間幼稚園，聽講有幾千人爭。佢覺得面試最緊要唔好怕醜，但係小朋友去到陌生地方，難免比較容易驚，細仔有少少怕醜，但都肯答問題，不過就唔係一去到就嘻嘻哈哈、好活潑嗰種，依家過咗第一輪面試，仲等緊有冇第二輪，好緊張。
佢話，依家要經歷幼稚園、小學同中學，加上要返工，所以呢排少啲出席活動。聽落都覺得佢又忙又辛苦，佢就話已經慣咗啦喎！