政情：秋乾養生 陳勇向「長老」取經
秋天來臨，天氣變涼又乾燥，所以要注重保濕。不過，唔止女性先注意呢樣工作，好似新界社團聯會理事長陳勇都有其保濕心得。
陳勇話阿媽教養生方法教得最好，就係要多食梨或者飲梨水，而身為福建人嘅外母都有傳授地道滋潤方式，就係一起身就飲杯暖嘅蜜糖水，實行靠食物去令自己唔好乾燥喇！
同北方人一樣 以食物保濕
不過，佢話連北方人都一樣由食物入手，好似以前初初去北京開會時，第一日覺得天氣乾爽好舒服，但第二日已經覺得抽乾晒整個人嘅水分，所以有當地人講笑咁同佢講，多食豬油等肥膩食物就好似將潤膚膏搽入體內，大嘆唔怪之得北方人飲食習慣比南方油膩得多。
佢近年似乎都多咗保養外表，皆因拎太太面膜去保濕嘅次數多咗，呢排乾燥又會頻密用潤唇膏怕敏感，估唔到佢都有貪靚嘅一面喎。