政情：區會或要求撤回 明日大嶼添阻力

深水埗或通過 西貢勢孤力弱

深水埗區議會廿三個議席有十一席建制、十一席泛民，所以報稱獨立嘅甄啟榮往往都成為關鍵一票。好似之前傾取消授權票嘅時候，就因為佢嘅一票而成功通過。今次反「明日大嶼」情況都係一樣，個動議由公民黨伍月蘭發起，民協譚國僑等八名泛民議員和議，佢哋鬧「明日大嶼」成本高、冇前瞻性、冇公眾諮詢，令民意出現強烈反彈，佢哋都主動搵過甄，希望佢支持，不過甄回覆查詢時就話，建制泛民都有向佢拉票，但目前未有決定。

甄話「明日大嶼」公布咗成個月，都聽咗唔少正反意見，以優先收回棕地為例，似乎係可以唔使填海就有好多土地，但啲土地會唔會好零碎、會唔會收到一塊、收唔到另一塊地呢？因抗議房屋署清拆白田邨商場而被檢控五宗罪嘅佢，直言最近忙緊官司相關嘅事，未有詳細睇區議會文件，需要再慢慢衡量箇中得失先再決定。但甄強調，政府正檢控佢五條罪，雖然控罪同「明日大嶼」冇直接關係，但認為政府係「無理檢控」，令佢懷疑政府會唔會所有政策都係一樣咁「無理」，所以佢會一併考慮埋咁話！

至於西貢區議會方面，動議係由新民主同盟范國威發起，有五人和議，佢哋都認為「明日大嶼」太貴，人工島會加劇氣候變化、破壞生態，甚至引用早前「山竹」襲港事件為證，認為填海方案不可行，亦不可持續，否則一旦遇上自然災害，人工島勢成孤島，難保市民性命財產。不過相比之下，西貢區議會嘅泛民議員可謂勢孤力弱，有關動議通過嘅機會唔大喇。