中環出更：西九小組副主席 傳建制屬意吳永嘉
立法會監察西九文化區計劃推行情況聯合小組委員會（監察西九小組）將於明日（6日）舉行首次會議，小組嘅副主席人選再有變動！早前傳出民主黨黃碧雲（一舊雲）將取代公民黨陳淑莊出任副主席，不過最新消息指，建制派屬意人選其實係工業界議員吳永嘉（Jimmy）。
建制派人士透露，由始至終都冇打算將副主席交畀民主派，早在十月初已開始游說Jimmy，惟對方未有一口答應。Jimmy回覆查詢時承認有建制派聯絡過佢，但目前仍在考慮中。民主派方面，有知情人士話，一早列清楚名單同建制派商討，但對方就小組委員會人選態度曖昧，所以大家都認為可根據協定方式處理，終決定由一舊雲出選。該人士又稱，建制派掌握委員會人選生殺大權，如果真係要做到咁盡，民主派都冇辦法，但係咁做真係不知所謂。
疑一舊雲出戰惹反彈
據了解，部分建制派都以為協調結果係由民主派出任副主席，所以好大機會係傳出一舊雲出戰後惹來反彈，迫令建制派急派人頂上，以包攬委員會正副主席。話就話有君子協定，其實都係要少數服從多數，真命天子會係邊個呢？明天就會揭盅！
卓妮