中環出更：遊俄凍病徐立之呻冇得飲伏特加
秋高氣爽最適合去郊遊呼吸吓新鮮空氣，但係一冷一熱亦都好易感冒。尋日卓妮出席一個生態遊活動時，見到香港大學前校長徐立之同現任校長張翔，兩人十分老友，一碰面就雞啄唔斷。徐立之大呻，最近去俄羅斯凍病咗，搞到連最愛嘅伏特加酒都無得飲，兼且兩星期內瘦咗十磅添！
張翔就好奇咁問，乜俄羅斯唔係陽光與海灘o架咩？徐就話，去咗波羅的海，嗰邊雖然有沙灘，但都開始轉涼，所以一個唔留神就冷親。張就笑笑口話，係咪再加上嗰邊啲食物唔太啱食，所以先會瘦咁多啊？講番張翔來港出任校長三個幾月，尋日第一次踏足郊野公園，佢大讚環境好好，十分舒服，希望有機會可以行多啲山。皆因佢以前住喺美國，日日都做運動，可惜嚟香港後就一直都好忙，冇乜時間郁動，所以好開心有活動可以喺香港去親親大自然喎。
龔仁心「三隻腳」行山夠安全
華懋集團執行董事龔仁心都有份一齊行，見佢攞住行山杖就知係實力十足嘅「驢友」喇！佢話除咗每晚運動四十五分鐘，依家仲會每星期行山，最近去過山頂同摩星嶺，大笑「三隻腳」行山安全過兩隻腳o架。咁有無遇過驚險事？佢就話好彩無，連蛇都無見過，最多都係遇過野豬啫。
運輸及房屋局副局長蘇偉文同機電工程署署長薛永恒都有出席，兩人都話喜歡行山，笑稱「有番咁上下年紀要多啲行山」，因為膝頭受唔住做啲劇烈運動。薛更呼籲大家，行山最緊要係量力而為，唔好夾硬嚟啊！
卓妮