新一份施政報告提出「明日大嶼」填海計劃惹嚟強烈反彈，唔單止有議員認為政府架空咗土地供應專責小組，市民亦鬧爆係倒錢落海，而立法會下周三召開嘅大會辯論施政報告致謝議案，民主派議員更狙擊「明日大嶼」計劃。
七名民主派就施政報告致謝議案提出修正案，當中只有胡志偉冇提到「明日大嶼」，而係要求檢討單程證計劃，其餘六人均將矛頭指向「明日大嶼」，強調會掏空政府財政儲備之餘，更加會破壞生態環境，而若果冇人口政策支持，單靠填出一千七百公頃根本就幫唔到市民。香港本土嘅范國威更乘勢要求政府取回單程證嘅審批權及回購領展，郭家麒同尹兆堅亦提出要求政府引用《收回土地條例》收回粉嶺高爾夫球場。
此外，繞過土地供應專責小組亦係「明日大嶼」為人詬病嘅原因，提出修正案嘅議員都指唔等小組交報告就提出填海計劃係缺乏民意基礎，梁繼昌更要求暫時擱置明日大嶼計劃，等小組交咗報告，先就各項土地供應作出評估，郭家麒甚至要求政府收回有關計劃。雖然政府好似好有決心想解決居住問題，但似乎就唔多符合民意，唔知喺咁大嘅反對聲音下，會唔會有所讓步呢？