政情：尹兆堅細佬曾被美國拒入境
每個國家或地區都有唔同嘅出入境規定，民主黨（白鴿黨）嘅立法會議員尹兆堅尋日透露，以前曾經同家人去美國時，細佬就被當局拒絕入境。早前報道過，香港公務員工會聯合會第一副主席尹兆泰係尹兆堅嘅親生細佬，唔通做公務員都入唔到境？
尹兆堅尋日喺立法會上自爆，曾經同細佬一齊去美國出席細妹嘅婚禮，但喺入境期間，細佬就被拒入境，仲話當時嘈咗一大輪後，細佬都仍然被驅趕。尹兆堅本身有三個細佬妹，佢就透露話被拒入境嘅唔係尹兆泰，而係另一個細佬。
與高級廚師背景有關
咁到底點解佢細佬入唔到境呢？尹兆堅就話美國當局事後就解釋，話係同佢細佬嘅職業背景有關喎。唔通佢另一個細佬都係從政嘅？非也，佢就話其實細佬係一個高級廚師，喺五星級酒店返工，仲要做咗好多年添！廚師都入唔到美國境，唔知佢細佬會唔會嚇怕咗，以後都唔敢去呢？