政情：去新西蘭帶錯衫 張宇人凍住玩
政商界人士經常都要離港公幹，執行李都執到慣晒，立法會飲食界議員張宇人（Tommy）自言都已經「練」到搭朝早九點飛機嘅話，可以喺早上六點先至起身，聽落都認真快手。不過，佢就自爆之前去新西蘭旅行時帶錯衫，結果佢帶嘅短袖衫褲全部都喺晒房度着咁話。
出發前急買羽絨背心
話說Tommy舊年農曆新年期間去新西蘭上船玩。位於南半球嘅新西蘭，喺香港冬天時正正就係當地最暖嘅時候。Tommy一心諗住當時新西蘭係夏天，所以就帶短衫短褲去，以為可以同陽光玩遊戲啦，點知佢嘅朋友就話畀佢聽，新西蘭好凍，於是佢出發前先即刻買件羽絨背心。
短袖衫褲只喺房度着
Tommy話好彩朋友有提醒佢，因為佢去到先至知道原來新西蘭嘅夏天仲凍過香港嘅冬天，佢帶嘅短袖衫褲只可以喺船上房間度着，一上甲板就要着長袖衫褲加羽絨背心，佢仲誇張地形容因為當地好近南極，雪山上嘅冰川炸彈擲落去都唔冧咁話。其實不論去旅行定公幹，出發前都應該留意當地天氣先嘅，憑印象估估下就唔係咁可靠囉！