政情：電費補貼加碼向政府施壓 建制敢嗌唔敢反
今年七月立法會休會前，政府同兩電公布新發展計劃《管制計劃協議》（《協議》），更宣布埋兩電加價。為咗減輕市民負擔，當局向立法會申請八十七億元撥款，以向每戶市民派三千元津貼，根據財務委員會議程，委員會最快今日就會開始審議相關撥款。據了解，手握十三票嘅建制大黨民建聯（民記）內部仍未有共識，更向環境局開價要求另類加碼以助市民減電費。呢次建制派反串做民主派向政府施壓，結果會係點？就連建制中人都話最後咪一樣要投贊成票。
放暑期前，政府喺零風聲傳出之際，突然聯同兩電召開記者會公布新發展計劃，當時環境局局長黃錦星更誇下海口，話希望津貼撥款可以喺暑假前通過。但有消息人士透露，當時已有建制派向政府施壓，叫價加一倍補貼額，由於雙方未傾掂數，撥款未能成功喺休會前通過。
多次磋商 環境局態度強硬
根據現時《協議》中，兩電嘅准許利潤係同資產掛鈎，即係資產愈多，兩電可獲嘅利潤就愈多，變相畀更多空間電力公司加價。據了解，民記亦係睇中呢個問題，認為用公帑補貼市民係應有之義，但既然政府已經出「雞」，兩電就應該出「豉油」，建議通過撥款後，政府喺兩電資產帳目上扣減八十七億元，令兩電長遠加價空間減少。有知情人士透露，環境局同民記喺暑假多次磋商，但局方態度強硬話做唔到，令到該黨感到不滿，至今仍未就是否支持撥款達成共識，大部分人建議要有條件支持。
泛民倡加條件增慳電誘因
該黨政策發言人周浩鼎回覆時，承認有向當局反映上述意見，到目前依然希望政府可以接納建議，重申用公帑補貼市民之時，亦有減輕電力公司的負擔，希望電力公司可以畀市民見到佢哋嘅誠意。至於其他建制派政黨，普遍都係支持撥款。民主派方面，絕大部分人都認為呢項撥款難投反對票，但各人喺會上會提出意見，其中范國威就話，希望可以加入條件增加市民慳電嘅誘因，例如慳得多津貼就多。而區諾軒則認為當局要推出有效措施資助劏房戶，兼研究安裝獨立電錶，否則就會棄權。
今次建制派反串做反對派，搖旗吶喊向政府施壓，可惜呢項撥款涉及民生，反對就會成為市民公敵，所以不論有幾咁唔滿意，民記亦都只能順政府意批出撥款o架嘞！