梁籌庭選勞顧會 黃國健寸年紀大
曾任政府署理文書主任嘅公務員工會聯合會總幹事梁籌庭，雖然退休多年仍關注勞工事務，兩年前落選勞工顧問委員會勞方委員，今年佢就捲土重來，參加今個月十號舉行嘅勞顧會僱員代表選舉。要參選自然要取得選民支持，不過手握選票嘅工聯會（工記）係咪支持佢仍係未知之數。工記立法會議員黃國健（KK）就話，工記係咪支持梁籌庭要睇好多因素，包括年紀，加上佢退咗休好耐，唔再係公務員，係脫離咗行業咁話。聽KK咁講，似乎對梁籌庭係咪仲代表到公務員都有疑慮噃。
多個議題上與工記有分歧
梁籌庭過往喺多個勞工議題上都同工記有分歧，有報道就引述佢話，雖然同工記關係麻麻，但都有向工記發信爭取支持。不過KK就話工記立法會勞工界前議員鄧家彪係獲工記支持參選，所以工記當然會先支持鄧家彪。對於梁籌庭話有發信爭取佢哋支持，KK就話呢啲係工會決定，但就直言梁籌庭已年紀大，同埋冇做公務員好耐，呢啲都要考慮咁話。
今年六十八歲嘅梁籌庭，已退休七年，確實係冇做公務員一段時間，但過往多年嚟為打工仔爭取權益，都有一定代表性。今次係咪可以重返勞顧會，繼續為勞工發聲，就要睇吓嚟緊嘅選舉喇！
卓妮