中環出更：孫公病愈皮包骨學唱歌練氣強肺
教育局前局長孫明揚早前曾因肺炎入深切治療部，佢近日出席防癆心臟及胸病協會成立七十周年慶典嘅晚宴，明顯消瘦好多，但仍相當精神，太太鍾小芬陪孫公一齊現身，非常恩愛。孫太大爆孫公住院十二個星期，出院時瘦到皮包骨，依家好番好多，佢近日搵咗老師教孫公唱英文歌練氣，又煲有營養嘅湯水畀孫公飲，仲話最緊要係鼓勵佢多啲出去見人，打扮得靚啲，回復正常嘅交際應酬。
孫公精神相當好，入場前講咗句自己係八月底出院嘅，之後就同孫太坐定定，冇周圍走嘞，不過好多嘉賓見到孫公都自動走埋去問候下。孫太以招牌笑容大講照顧孫公嘅妙招，佢話孫公肺炎後，個肺較弱，今次出席防癆會嘅活動，正好介紹有老師教唱歌會教埋抖氣，對肺有好處(口架)，而均衡飲食都好重要，孫公剛出院，想幫佢補充多啲營養，自己同新抱就用一隻雞、一斤豬(月展)、十幾隻田雞煲成濃湯，雪凍後撇走肥膏，用啲湯嚟淥菜、煮麵、煮飯，又有營養又好味。
孫太又話對瑪麗醫院嘅醫護人員好有信心，仲教丈夫「talk to your body」，喺心跳唔正常時，叫個心唔好跳得咁快，一家人都比較樂觀，開心對病情好有幫助，孫公出院後，自己都鼓勵丈夫多啲外出，丈夫每次出完街都自覺有進步。
78歲藍義方日運動個半鐘
香港防癆會董事局主席藍義方自爆已七十八歲，每日都會做個半鐘頭運動，聽落相當健康。在場又見到衞生防護中心前總監、現任香港中文大學中醫學院院長梁挺雄，佢大讚自己啲學生好乖，好用心讀書，又話教學生醫術外，最重要係醫德喎。
卓妮