成語「葉公好龍」大家聽得多，咁大家知唔知「林婦好善」又係咩意思呢？等功夫茶話過你知啦。「林婦」就係特首林家媳婦鄭月娥，「好善」即係口頭上講到自己好仁慈，成個大善人咁款，實際上就係假慈悲、真涼薄嘅化身，最鍾意欺壓弱勢社群。嗱，話口未完，林婦已經露出偽善嘅狐狸尾巴喇。
話說港府欲興建公務員學院，至於選址咯喎，左不揀右不揀，偏偏揀中咗職業訓練局轄下觀塘展亮技能發展中心，即係不惜殺校，為未來嘅官老爺讓位。喂，展亮中心係香港唯一為有特殊教育需要嘅年輕人提供培訓及就業指導嘅機構，展亮被殺，咪即係欺負殘疾人士？港府解釋因為嗰度交通便利，方便公務員上完堂返工喎，莫非殘疾人士輪椅上落會方便得過行得走得嘅公務員？呢啲倒行逆施嘅思維，唔通就係林鄭嘅「管治新風格」？
立法會尋日開會討論呢單嘢，議事堂梗係炮聲隆隆，唔理建制派同埋反對派，齊聲鬧爆政府歧視弱勢階層，點不知勞工及福利局局長羅致光仲死撐，話提早咗三年通知學員同家長，已經係好負責任嘅做法喎。乜嘢係「人無恥便無敵」，大家睇到嘞，特衰政府就係人辦。官老爺話就話會物色新中心，做到無縫交接喎，但喺香港地邊個唔知「港官靠得住，豬乸會上樹」吖，你話班學生同埋家長唔憂心就假。
真係諗極都唔明，港府唔係體恤殘疾人士特殊需要，反而帶頭進行傷害，似係吼準佢哋上街示威有難度咯。枉林鄭仲話以做過社會福利署署長而自豪，成日自誇點樣了解基層同弱勢社群，照道理佢應該更加關注弱勢需要至係（口架），點知原來所謂嘅熟，只係唔熟唔食，當殘疾人士波咁踢。平機會真係有Guts嘅，仲唔拿拿臨控告港府帶頭歧視！
講起都幾諷刺，港府話建公務員學院係想學新加坡強政勵治喎，查實係學內地嗰套官老爺作風就真。建學校並非無地，市區仲有大把閒置官地，講到交通便利、風涼水冷咯喎，揀禮賓府建校亦得，呢度鳥語花香，返政府總部「門常開」幾分鐘車程就到嘞。當然，深水埗「南亞村」亦係好選擇，不過欺善怕惡嘅港官當然柿子挑軟的捏啦。
講來講去，呢個政府眼中只有權貴，對待普通市民就冇心冇肺，連殘疾人士都可以開刀，仲有乜嘢刻薄陰騭嘢做唔出？林鄭之前仲話「被網絡欺凌」喎，扮晒可憐博同情，直頭惡人先告狀，家陣邊個蝦蝦霸霸，邊個先係受害者，仲使問咩！