清初思想家唐甄認為，為政最重要的是付出實際行動，政府要實幹而不是只管發文，不問落實，否則就會「百職不修，庶事不舉，奸敝日盛，禁例日繁，細事糾紛，要政委棄」。唐甄是個成功的實踐者，他在山西做知縣時，為了動員百姓種桑養蠶，不但挨家挨戶做說服工作，更帶頭示範，結果一紙文書通告未發，就在三旬之內種桑八十餘萬株。
老朽忽然想起這則「為政貴在行」的軼事，皆因看到本報「正論」指房屋署轄下的遊樂場竟淪為兒童的地獄，房署塞責認真靠害！房署咁樣對待未來社會棟樑確實太不該，定期檢查吓遊樂場，睇吓有乜要維修或是居民有冇乜嘢設施需要添置，試問又有幾難？真係唔講都唔知，有些遊樂設施已使用了三十年，竟然從未更新過；即使有設施壞了，也要拖延數月才處理。以如此Hea做心態處事，難怪颱風山竹過後，冧樹清理至今仍未搞掂！
本港嘅休憩空間和社區康樂設施不足，公屋遊樂場自然成為基層兒童的課餘好去處，可惜不少遊樂場設施老化，成為整傷兒童嘅陷阱。好似觀塘彩德邨彩信樓附近嘅遊樂場，大部分地墊已經「翹起」，不但細路仔易絆倒，大人也常因失足而受傷。又有些遊樂設施日久失修，有凸出的螺絲頭冇包番好軟墊，曾有細路被割傷而要入院縫八針，如果傷及眼睛，後果更不堪設想。
一個遊樂場之不治，足見房署的官僚風氣氾濫成災。房署之不作為處處可見，申訴專員公署炮轟它閒置十一萬平方呎公屋儲物室，每月少收逾四百萬元租金，乃不折不扣的大嘥鬼！此外，本報踢爆房署將旺角海富苑一個千呎公園同埋三千呎空中花園重門深鎖二十年，卻將浪費土地資源嘅責任推畀業主立案法團。房署高官似乎都係太極推手掌門人，睇怕要喺其辦事處掛上「為政貴在行」做座右銘！