政情：收料站：梁耀霖捲土重來 競逐旅議會理事
旅遊業議會（旅議會）將於下月廿九日舉行周年大會，改選四名由選舉產生嘅理事，據了解，今次有六人競爭四個理事空缺，包括曾任旅議會副主席嘅香港入境旅遊接待協會主席梁耀霖（Paul）捲土重來爭取重返旅議會。
獲多個屬會提名
據知六名候選人已按恰當程序獲得提名，其中有兩名候選人係角逐連任理事，分別係由香港華商旅遊協會提名嘅羅啟邦，及國際航空協會審訂旅行社商會等兩個屬會提名嘅梁天龍；另外三名候選人分別係中國旅遊協會提名嘅陳錦全、國際航空協會審訂旅行社商會提名嘅梁國興，及國際華商觀光協會提名嘅林樹層。
不過，要數今次知名度最高嘅候選人，相信係前旅議會副主席Paul，據知佢獲香港旅行社協會等三個屬會提名參選，對於今次Paul靜極思動再次出山角逐旅議會理事，業界有唔同解讀，最終Paul能否脫穎而出，約一個月後自有分曉。
資料顯示，旅議會共有廿九名理事，包括旅議會主席、八名選舉產生理事、八名屬會代表及十二名政府委任嘅獨立理事，其中八名選舉產生嘅理事會隔年更替，選出四位新理事。