政情：八網難逃：新加坡考察 姚銘怕飲再生水
北區區議會早前到新加坡考察，據知實地了解再生水嘅廠房、單車泊車系統等，究竟乜嘢係再生水呢？北區區議員姚銘話，此行最得意係去咗參觀再生水廠，因為再生水係將雨水等污水變成可以飲用嘅水，當日甫去到廠房，已聞到類似污水處理廠嘅味道，姚銘即時打咗個突，因為聞完呢陣味後，轉頭就要試飲再生水。
指香港值得研究
姚銘自言，起初對於飲再生水都唔係咁接受，但後來得悉，原來喺新加坡一打開水喉，就會飲到再生水，係避無可避，因此大部分議員都照樣試飲。佢又提及，香港本身有東江水，但都值得研究再生水呢種技術，最終係咪要普及化，就係另一回事嘞。
另一個值得香港有關方面參考嘅係新加坡嘅單車泊車系統，姚銘話，當地嘅單車泊車系統將單車泊入儲藏庫內，折合只需三百港元一個月，覺得值得香港一方參考。